Alkòl ak Sèvo a: Yon Apèsi (Haitian Creole)

image of the brain — Imajri tansè difizyon (Diffusion Tensor Imaging, DTI) tras fib nan sèvo a kay yon gason 58 lane ki gen twoub konsomasyon alkòl. DTI katografi wout matyè blan nan yon sèvo vivan.
Imaj koutwazi Adolf Pfefferbaum, M.D., Ph.D., ak Edith V. Sullivan, Ph.D.

Alkòl jennen chemen kominikasyon sèvo a epi li ka afekte aparans sèvo a fason sèvo a fonksyone. Alkòl rann li pi difisil pou zòn nan sèvo a ki kontwole ekilib, memwa, lapawòl, ak jijman fè travay yo, sa ki lakòz yon pi gwo risk pou blesi ak lòt rezilta negatif. Lè w bwè gwo kantite alkòl pandan lontan, sa lakòz chanjman nan newòn yo, tankou rediksyon nan gwosè yo. Genyen anba la a kèk sijè kle anrapò avèk alkòl ak sèvo a.

Sèvo Adolesan an

Sèvo adolesan yo pi frajil ak efè negatif alkòl pase sèvo granmoun. Abi alkòl pandan adolesans kapab modifye devlopman sèvo a, sa ki gendwa lakòz chanjman ki dire lontan nan estrikti ak fonksyon sèvo a.

Alkòl Pwovoke Twoub Memwa

Abi alkòl ka lakòz twou memwa alkòl pwovoke. Twou memwa se twou vid nan memwa yon moun pou evènman ki te rive pandan li te sou. Twou vid sa yo rive lè yon moun bwè sifizaman alkòl ki fè li rive bloke tanporèman transfè souvni yo soti nan estokaj akoutèm pou ale nan estokaj alontèm—ke yo rele tou konsolidasyon memwa—nan yon zòn nan sèvo a yo rele ipokanp.

Ovèdòz Alkòl

Lè ou kontinye bwè malgre siy gwo twoub aklè, sa kapab lakòz yon ovèdòz alkòl. Yon ovèdòz alkòl rive lè sitèlman gen anpil alkòl nan sikilasyon san an, zòn nan sèvo a ki kontwole fonksyon debaz sipò lavi yo—tankou respirasyon, vitès batman kè, ak kontwòl tanperati—kòmanse kanpe. Sentòm yo nan ovèdòz alkòl gen ladan konfizyon mantal, difikilte pou rete konsyan, vomisman, kriz, pwoblèm pou respire, vitès batman kè ralanti, po imid, reyaksyon ki vin fèb, pa egzanp ou pa gen reflèks kèplen (ki anpeche ou toufe), ak tanperati kò ki ba anpil. Ovèdòz alkòl ka lakòz domaj pèmanan nan sèvo oswa lanmò.

Twoub Konsomasyon Alkòl

Amezi moun kontinye bwè alkòl apre yon sèten tan, chanjman pwogresif gendwa rive nan estrikti ak fonksyon sèvo moun yo. Chanjman sa yo ka konpwomèt fonksyon sèvo a epi mennen nan tranzisyon soti nan konsomasyon kontwole yon lè konsa pou vin nan abi kwonik, ki ka difisil pou kontwole epi abouti nan twoub konsomasyon alkòl (Alcohol Use Disorder, AUD). Moun ki gen AUD nivo modere jiska grav ka antre nan yon sik adiksyon ak alkòl. Yo pa konprann konplètman nan ki pwen sèvo a gen kapasite pou l retounen nòmal apre yon moun sispann bwè pandan anpil tan, men yon kantite etid k ap ogmante deplizanpli endike omwen kèk chanjman nan sèvo a AUD pwovoke—epi chanjman nan panse, sansasyon ak konpòtman ki akonpaye yo —kapab amelyore epi pètèt defèt avèk plizyè mwa san bwè alkòl ditou. (Yo bay plis detay sou newosyans AUD yo bay nan seksyon Neuroscience: The Brain in Addiction and Recovery [Newosyans: Sèvo a nan adiksyon ak rekiperasyon] nan The Healthcare Professional’s Core Resource on Alcohol [Resous debaz pwofesyonèl swen sante sou alkòl].)

Ekspozisyon nan Alkòl Anvan Nesans

Ekspozisyon nan alkòl anvan nesans ka lakòz domaj nan sèvo a, ki mennen nan yon seri pwoblèm nan devlopman, pwoblèm pou panse ak aprann epi pwoblèm nan konpòtman, ki ka parèt nenpòt ki lè pandan w timoun piti. Alkòl ka deranje devlopman timoun ki nan vant lan nan nenpòt etap pandan yon gwosès—sa gen ladan nan etap byen bonè yo ak anvan menm yon fanm konnen li ansent.